Vår – med ein smak av sommar

Så var våren her, endeleg! Sjølv om det har vore kaldt og ikkje noko drivande ver, måtte eg prøva rabarbraen alt i forrige veke. Dei første få stilkane måtte nesten gravast fram, det var fint lite som stakk opp for berre nokre dagar sidan.

untitled-04429Eg måtte på bygda og tigga stilkar for å få nok til vårens første høgdepunkt – rabarbrasorbéen. Men det gjekk, og  resultatet – ein lett rosa, kremaktig, frisk, søt og iskald sak, som passar fortreffeleg til ein nygrilla Crème Brûlée. Til alt overmål har me no òg funne den perfekte vinmatchen til denne vårlege desserten, takka vere Anniken frå druefin.no. Den portugisiske hetvinen Moscatel de Setúbal har nok fylde og sødme til å matcha dei karamelliserte smakane i Crème Brûlée’en og let seg heller ikkje vippa av pinnen av rabarbraen. Framover skal me gle oss over mange slike lyspunkt og med veret som er no, er det slutt på å leita bygda rundt.

Lag ein stor porsjon, like godt, sorbéen held seg fint i frysaren om du pakkar han godt i aluminiumsfolie. For å få ei stor kule til 10 personar treng du:

  • 1/2 kg rabarbra, skoren i tynne, fine bitar
  • sukkerlake av 200 g sukker og 1 1/2 dl vatn
  • 1/2 kg italiensk marengs, sjå oppskrift her
  • Vask og skjær rabarbraen. Kok sukkerlake og avkjøl. Kjør rabarbra og sukkerlake til fin puré. Mål opp godt avkjølt marengs og bland denne godt med puréen.
  • Kjør i ismaskin og set i frysar til du skal bruke han. Ta sorbéen ut av frysaren ca 15  – 30 minutt før du serverer, avhengig av kor frosen han er. Lag fine kuler med ei isskei.

Tips: I denne varianten tilsette eg 4 ss hylleblomsaft og reduserte tilsvarande på sukkerlakemengda. Hylleblom gjev ein perfekt smakskombinasjon saman med rabarbra og  du kjenner at sommaren nærmar seg.  Men du lyt nok og venta til sommaren med å laga hylleblomsafta og så kan du bruke ho neste vår.  Rabarbrasorbéen er sjølvsagt like god utan også.

Du finn oppskrift på hylleblomsaft her.

untitled-04442

Advertisements