Hylleblomsten er her – hent inn sommarsmaken!

No blømer hyllen. Eg er så heldig å sjå rett ned på eit felt med blømande hyll, der hylleblomsten med sine kvite skjermar lyser opp det mørkt grøne bladverket.

Du finn han óg forvilla over store deler av landet, så ser du deg litt rundt no, er det store sjansar for at du oppdagar ein busk eller faktisk også eit stort tre med dei karakteristiske kvite blomsterskjermane.

Hyll er ein kjend plante frå langt tilbake som no også har fått sin renessanse her heime. Han har hatt ein viktig plass i folkemedisinen og hyllebæra inneheld stoff som faktisk verkar mot virus. I dag vert han både dyrka og vidareforedla i Norge, mellom anna rett over fjorden, i Fresvik.

Bæra er ikkje klare før litt utpå hausten, men blomen er også ei flott råvare. Vi kan laga hylleblomsaft ved å klippa av blomsterskjermane, legga dei i ein sukkerlake saman med sitron og etter nokre dagar har vi ein smaksbase som resten av året kan krydra både desserten og drikka vår med ein smak av sommar.

Når rabarbraen kjem tilbake neste vår, vil den og hylleblomsafta utgjere ein fantastisk smakskombinasjon. Den passar òg godt med jordbæra no når dei er komne for fullt. Safta kan også brukast aleine, som smakstilsetjing i iskrem og sorbet, eller ganske enkelt som eit glas leskande drikke, gjerne tilsett eplejuice og nokre bobler frå ei flaske Farris eller liknande.

Den nyaste desserten eg laga med hyll er ein sabayonne med hylleblomsaft, den var perfekt over nyplukka jordbær frå nabolaget.

 Hylleblomstsabayonne til nyplukka jordbær

  • 100 g eggeplomme, ca 5 stk
  • 75 g hylleblomsaft
  • 75 g kvitvin
  • 50 g sukker
  • Ha alt i ei skål som toler varme. Sett skåla over ei gryte med varmt vatn, vatnet skal ikkje nå opp til skåla. Varm opp, og pisk heile tida. Pisk til blandinga er luftig og har kremkonsistens. Ta skåla bort frå varmen og fortset å piske til blandinga er litt avkjølt og held forma. Aus over dei nyplukka jordbæra og server.

Tips:  Hylleblomsafta er eigentleg en slags sirup, den er laga på sukkerlake og inneheld mykje sukker. Derfor må vi gå ned på sukkermengda i forhold til ein klassisk sabayonne som blir laga med like deler av eggeplommer, sukker og vin. Samtidig blir hylleblomstsafta ein del av den totale væskemengda, slik at vi og må justere mengda vin. Til denne desserten fungerer ein Moscato d’Asti perfekt, den har dei samme smakstonane i seg som hylleblomsten. Serverer du eit glas ved sida av desserten òg,  gjer du stas på både jordbæra og hylleblomsten.

Tips:  Syns du sabayonne høyrest veldig komplisert ut? Tenk eggedosis, berre at du brukar ein god vin i og at du piskar for hand over varme.

 

Foto: Mariell Øyre